يوميتى 10 جنيه
نزلت السوق اتبضع
صراحه انا قلبى اتوجع
رغيف الفينو بريال
والجبنه ب6 جنيه
اجبها يمين وشمال
هى العشره جنيه
ده فطار العيال
امال هنتغدى بايه
قولت اجيب مكرونه
الكيس اهو بجنيه
وصلصله ولحمه مفرومه
بردو العشره جنيه
قولت خلاص
فى العشا توفيره
فول بيض طعميه وايه
اه كمان عيش بجنيه
راحت خمسه جنيه
صرخت وبصوت عالى
يا اخونا الضغط اهو جالى
ملعون كل الى فى بالى
دى يوميتى 10 جنيه
بحاول اكملها وعايز رايكم فيها
ومش عايز مجاملات فهمين ولا لا
هناك ١٧ تعليقًا:
هى ملاهاش غير حل واحد تصومه وتاكل وجبه واحده بس فى اليوم
ربنا يكون فى عونك
القصيدة حقيقي حلوة كمل..مستنية الباقي
هههههه
جميله
قوي
تحياتي
دا زجل على فكر مش شعر
الزجل بيكون اقرب لقلوب الناس لأنه بيكون لغته اسهل
حاول تقرأ كتير لاحمد فؤاد نجم وبيرم التونسى
محاوله جميله
ههههههههههه
لاحظ إن كل الأسعار زادت
علشان العلاوه بتاعة يوليو
عيد حساباتك من جديد بقي
وقول هتوصل كام؟؟؟
سلاماااااااااات
وجعت قلبي ... تعال عندنا رغيف الفينو ب15 قرش
وبجد حلوة واللهي من غير مجاملة كملها مستنيين الباقي
تحياتي
semsem
اه والله ربنا يكون فى عون العامل البسيط
sokoothansawat
والله انت احلى
ابن ناصر
ربنا يخليك يا صديقى
ابو لهب
فعلا الراجل ده اتظلم كتير
حزين
ايوة كده هو دة المطلوب تدلينى وتعرفنى بجد انت تشرفنى ومشكور جدااا
reri
اه كل الاسعار بتعلى الا البنى ادم بيرخص مش عارف اعمل ايه مش لاحق ارتفاع الاسعار
ايمنا الحلوة
فين الرغيف ابو 15 قرش ده دلينى عليه
ايوة كده شجعونى
alqasam
والله انت الى بطل نورتينى
وحياتك انا حسبتها ولما ملقتهاش نافعة قلت بلاش جواز واعيش بالعشرة جنية لوحدي بدل ما اجيب تلاتة كمان يشاركوني فيها
جايز هما عاملين كدة علشان تحيد النسل اكيد بردة مش كدة
جامده جدا جدا جدا
كمل
جامد موت والله انت فنان كمل انا مستنيه الباقى مدونتك كلها بجد لذيذه جدااااااا وكل موضوع احلى من التانى تحياتى لك
لا بجد بوست حلو اوي
طب دلوقتي حتعمل ايه بعد ما لااسعار زادت زياده وزياده
توصيه دخول رمضان بقى
ربنا يكون في عون العامل البسيط اللي مهيته طول الشهر ممكن تكون 90 جنيه
وبيكون بقى في رقبته اسره بحالها
إرسال تعليق