أمموهم ملعون ابوهم

ذى ما المثل بيقول " اخد الحق صنعه " بس اهم حاجه تفهم الصنعه وتعرف حقك الى راح منك وتحدد مين الى اخده بالظبط من غير ما تظلم ومن غير ما تيجى على حد وكله "بما يرضى الله "

اولا قضايا الفساد لا تسقط بالتقادم  وثانيا احنا اتظلمنا كتير والفساد كان للركب ومازال بس حاليا  بيحاول يوفق اوضاعه 

وقبل ما يوفق اوضاعه وعشان نسامح كلنا لازم نبنى على نضيف والى خد الحق نجيبو منه بسلطه القانون الى الدوله مخوله بتطبيقه " مش تطبقه وتحطه فى الدرج" لا تطبقه بحزم 

يعنى مثلا واحد سرقنى واكل عرقى وبعد كده قالى الى راح راح وتعالى اعرق تانى وهحسبك " بما يرضى الله " . طب بالنسبه للقميص الى عرقت فيه وغسلته وداب ده ملوش تمن عندك 

لا ليه تمن حتى لو الى اخد الحق ده تحايل على القانون وكلنا عرفين انه تحايل على القانون وممكن نقسم على كده كمان بس سياده القاضى ملوش غير الورق والقانون لان ده نص القانون القديم سعادتك( كما يعاقب بالحبس مدة لا تجاوز ثلاثة شهور وبغرامة لا تزيد على خمسمائة جنيه أو بإحدى هاتين العقوبتين من تعمد عن طريق إعطاء بيانات خاطئة عدم الوفاء بمستحقات الهيئة القومية للتأمين الإجتماعى كاملة (مادة (179(2)) من قانون التأمين الإجتماعى رقم 79 لسنة 1975).  ويعاقب بغرامة قدرها مائة قرش كل صاحب عمل فى القطاع الخاص لم يقم بالإشتراك فى الهيئة القومية للتأمين الإجتماعى عن أى من عماله لخاضعين لأحكام قانون التأمين الإجتماعى،)  

نعمل ايه احنا بقى نحبسه 3 شهور وغرامه 500 جنيه ولا ناخد منه جنيه على كل عامل اقولك نعمل ايه 

نستحدث قانون جديد وناخد من الظالم ده الى القانون معرفش ياخد منه ولا حق ولا باطل "والحق ابلج والباطل لجلج" 

التأميم هو الحل السليم لكل حرامى مستعار فى هيئه رجل اعمال 

يعنى مثلا فى المصانع وتحايل اصحاب المصانع على الدوله والقانون ...

مثال نص عمال المصنع متأمن عليه والنص تانى لا والعامل لسه جاى يمضى العقد بيمضى معاه استقاله عشان يفصلك من المصنع لما يجى التأمين يزيد ويكتب المرتب  اقل من الواقع عشان يدفع تأمين على الشامل اقل غير بقى تهرب من الضرائب ونسبه العمال فى ارباح المصنع فى السنه الى بيخلع منها صاحب المصنع بالف طريقه وطريقه وغير انه بيكتب درجه العامل الوظيفيه عكس الحقيقه وحجات تانيه كتير 

لو جيت حضرتك تحسب المكسب الحرام الى رجل الاعمال صاحب المصنع اخده فقط من التحايل على القانون هتلاقيه ملايين فوق بعضها ومش هتعرف تاخدها منه بالقانون العادى يبقى لازم نأمم امه عشان نرجع الحق لاصحابه 

تعالى نحسبها مع بعض وبشويش صاحب المصنع المفروض بيدفع 10% تأمين على المرتب الاساسى للعامل يعنى مثلا العامل بياخد 700 جنيه فبيدفع صاحب المصنع 70 جنيه فى الشهر وده مبيحصلش اساسا لانه بيسجل مرتبه اقل من كده بكتير بس احنا هنقول العشره فى الميه 70 جنيه فى 12 شهر يساوى كام يا حلوين يساوى 840 جنيه فى السنه فى 2000 عامل هيساوى 1680000 هنقول المصنع بيتهرب من 10 سنين 16800000 شايف الرقم يا بيه شايف يا استاذ شايفه يا اختى وخدين بالكم يا اخوانا ده مصنع واحد غير طبعا فوايدهم 

يجى افندى محترم يقولك ما هو هيقفل المصنع والعمال هتتشرد اقولك يا سيدى احنا هنقدر السرقه دى وناخدها سيوله من الباشا صاحب المصنع ولو تنح وقالك انا هقفل المصنع هناخد منه المصنع ونحوله لقطاع عام والفلوس السيوله الى عرفنا ناخدها من صاحب المصنع تتحط فى البنك وبفوايدها ندفع مرتبات العمال 

واخد الحق صنعه ودى بقى صنعه الحكومه