الأحد، ٢٤ يونيو ٢٠٠٧

عدد من الشكر لوزارة الصحه



يا حسن يا حسين انا تعبان من يوم الاثنين

هبوط وانخفاض فى الضغط وعدم تركيز وصداع والدكتور كتبلى فواتح شهيه ومهضم وفيتمينات

انخفاض فى سعر الجنيه المصرى امام الجنيه السودانى ادى الى انخفاض ضغط دمى

شكرااا لدكتورة الاستقبال فى المستشفى العام الى كتبتلى محلول ملحى مضاف عليه حقنتين معرفش ايه


شكرااا للممرضه الى علقتلى المحلول الملحى وقلتلى مدد على السرير القذر وجابت بتاع كده علقت عليه المحلول اقذر من السرير


وشكرااا لنموس وزارة الصحه الى فضل مسلينى طول فتره تعليق المحلول وكان مثالى فىاختيارمكان القرص باحتراف


وشكرااا لقطط وزارة الصحه الى فضلت تتخانق مع بعضها وتصدر اصوات العواء الى اول ما بنسمعها نقول فى حد هيموت النهارده


وشكرااا لصحبى الى فضل يهش النموس من عليا ويزعق للقطط وموتنى من الضحك


وشكرااا لكل الناس الى معاها موبيلات حديثه داخل المستشفى ومشغله اغانى ومثليانى


وشكرااا للتمرجى الى شتم الممرضه وقالها يا بنت ستين كلب وكان عملى جو هادى


وشكرااا للممرضه الى شالت المحلول بعد ما خلص بعنف


شكراا قوى يا وزارة الصحه انا كلفتك كتير مره كلب عضنى واخدت 6 حقن مجانا على كام شهر

وكمان ضغطى وطى وكلفتكم محلول ملحى مضاف اليه حقنتين معرفش ايه


المهم انا شايف ان دكتور امتياز لوحده فى الاستقبال حرام وغلط وميصحش ولا ايه رايكم


وادعولى يا جماعه ان ربنا يشفينى

السبت، ٩ يونيو ٢٠٠٧

يا صلاه الزين




يا صلاة الزين يا صلاة الزين
عبارة و قطرين يا صلاة الزين


يا وزير النقل يا اوستطنا سوق بينا وقول ريحين على فين

يا صلاة الزين يا صلاة الزين
على وزيرنا يا صلاة الزين


بما انى انا سايق بيكم وواجبى اوصل معليكم لموته تليق بالمصريين
تحبو تموتو فى عبارة الغريق شهيد والله خسارة مذكورة فى الدين
او قطر ذى الطيارة يتكعبل فى عقب سيجارة وهى موته كلها اثارة طبعا رضيين

يا صلاة الزين يا صلاة الزين
على وزيرنا ياصلاة الزين


منصور ركبنا الهوا وقلبنا و متسئلش ريحين على فين
انا شايف لو محدش عجبو يتمشى او يركب عجلو محناش نقصيين

يا صلاة الزين يا صلاة الزين
على جهنم كلكم ريحين

السبت، ٢ يونيو ٢٠٠٧

مش هسافر مش هسيب


مش هسافر مش هسيب
وفى البلاد اصبح غريب
بعدى عنك والله عيب

مش هسافر مش هسيب

ناصرى اخوانى شيوعى
حبك انت بين ضلوعى
ولو حتى اموت بجوعى

مش هسافر مش هسيب

ولو الكل سابك وسافر
وللموت سبونى هعافر
اموت شهيد ولا موتش كافر

مش هسافر مش هسيب

دة ترابك ليا قوتى
يضمنى وقت موتى
متفكريش بايدى سكوتى

مش هسافر مش هسيب

القيود منعانى يا اما
وقلبى متلهف لضمه
ولوفضلت حياتى ضلما

مش هسافر مش هسيب