الخميس، ٢٦ يوليو ٢٠٠٧

الى سوزان مبارك الى مش امى




الى السيده الفاضله سوزان مبارك ام اى حد بس مش امى
جميل قوى موضوع القراءه للجميع بس هى ايه نوع القراءه هو ده الى نختلف عليه
يعنى حضرتك وكل رموز الفكره دى بينقو لينا الى نقراءه وايه الى منقرهوش
وايه الى يعتبر ثقافه وايه الى ميعتبرش ثقافه يعنى مثلا هموت على بعض الكتب ومش عارف اجيبها ادخل مكتبه الاسره القى كتب تجيب تخلف عقلى وكلام ميستهلش ثمن الطباعه
وبشكرك طبعا لانك السبب الرئيسى فى دخولى مدرسه فنيه بدلا من الثانويه العامه
كنت بجيب قصص ادب العلمى للناشئين واحطها فى وسط الكتاب وقال ايه الواد بيذاكر وطبعا كان سعرها رمزى وتشكرى على كده
فعلا اسعار الكتب رخيصه وكلامها ارخص بغض النظر عن القصص المترجمه
بس بردو مش معقول كل ما اجيب كتاب افتح اول صفحه الاقى موجود صورة حضرتك وكلمتين عن حضرتك واكن احنا يعنى بنتقل على حضرتك وحضرتك دفعه لينا وعمله معانا واجب وبتتكرمى و بتتعطفى وبتسمحلنا نقراء
وال ايه يعنى احنا مش عرفين الفلوس دى جيه منين حضرتك بتلفى على دول العالم تشحتى علينا
يا ام جمال حرام عليكى نفسى القى كتاب للمعارضه فى مكتبه الاسره نفسى القى كتاب حتى لو شاعر معارض
ارحمينا بقى
وال ايه مارثون لسيدات مصر يا هانم احنا امهتنا بتمشى بالعفيه والرجاله بس هما الى بيجرو على اكل عيشهم
والف مبروك على عمليه التجميل الاخيره
فى كده فى الدنيا



الجمعة، ٢٠ يوليو ٢٠٠٧

يوميتى 10 جنيه




نزلت السوق اتبضع

صراحه انا قلبى اتوجع



رغيف الفينو بريال

والجبنه ب6 جنيه

اجبها يمين وشمال

هى العشره جنيه



ده فطار العيال
امال هنتغدى بايه



قولت اجيب مكرونه

الكيس اهو بجنيه

وصلصله ولحمه مفرومه

بردو العشره جنيه



قولت خلاص

فى العشا توفيره



فول بيض طعميه وايه

اه كمان عيش بجنيه

راحت خمسه جنيه



صرخت وبصوت عالى

يا اخونا الضغط اهو جالى

ملعون كل الى فى بالى

دى يوميتى 10 جنيه


بحاول اكملها وعايز رايكم فيها

ومش عايز مجاملات فهمين ولا لا

الأحد، ٨ يوليو ٢٠٠٧

محاولات مع الفساد وشكوه الى رب العباد

محاولات مع الفساد..... وشكوه الى رب العباد
شوفو بقى انا هكتب تجارب ومحاولات مع الفساد والفاسدين وبشكى لرب العالمين يرحمنا منهم اجمعين
المحاوله الاولى
كنت بخلص ايجراءات ترخيص محل بعد ما دوخت السبع دوخات قالولى لازم تاخد دورة اطفاء سريع من المطافى وروحت اسأل فى المطافى عن الاجراءات ولقيت الموضوع متعب قوى اسبوع كل يوم من الساعه 8 الصبح لحد الساعه واحده الضهر شريكى قالى ياعم كبر دماغك هى 10 جنيه للصول هيظبط كل حاجة ويديك الشهاده قولتلو لاااا استحاله ضد الظلم يرشى قالى اتنيل على عين اهلك قولتلو انا هروح الدورة وايه يعنى بدل قانون وحاجة مفيده ( طبعا بتريقه وسخريه راح شاتم مفيده ) وروحت الساعه 8 الصبح وكتبت اسمى وبداءت الكارثه اقصد الدورة ولقيت الصول الطيب قوى بينده اسمى وبيقولى شيل الخرطوم وااعمل كده وكده يا جدعان والله الخرطوم دة عايز عشره يشيلوة قولتلو يا فندم انا جاى اتضرب على طفايه حريق عشان المحل قالى الدورة لازم تتاخد كامله ( روحت انا شاتم كامله ) المهم
نفضت لحضره الصول وقلت ياواد خليك واقف مع الناس وخلاص لقيت الموضوع بجد وبيقولو هاتو السلم وبكره فى تدريب على الحاريقه الكامله ( اشتمو معايا كامله والنبى )روحت رافع الرايه البيضه وروحت الساعه 11 وحلفت لا يمكن اروح تانى وصحبى دفع 10 جنيه تانى يوم واخدت شهاده تثبت انى مدرب على اطفاء الحريق لمده اسبوع وواد مفيش منى اطفائى عشره على عشره
وسلملى على المطافى وفشلت المحاوله الاولى
المحاوله الثانيه
روحنا الشهر العقارى نوثق عقد ايجار ملقيناش الموظف المختص الساعه 10 والموظف مش موجود طب فين رئيسه دلونى لقييت اسمه جمال عبد الناصر قولت الله اكبر ولله الحمد النصر لمصر وقولتلو قالى والله ( بحزم كده وبجديه )قالى عشر دقايق لو مجاش تعالى قولى شكرته جداا وخرجت وعدت العشر دقايق ثم النصف ساعه ( وانا قال ايه صابر عشان ميضرش فى اكل عيشه هاؤ ) وفاض الكيل بيا روحت للمدير تانى قالى يافندم تلقيه بيفطر فى القهوة الى تحت دى وشاورلى على القهوة واكنها تابعه للشهر العقارى ودانى وش خشب روحت محروج ومتنيل على عينى وخارج وجه الموظف واعد وانجعص والناس بشر عليه ولا اكنه بيبيع فراخ مدعمه ( الفراخ المدعمه دى الى ملهاش طعم اكيد عارفها ) وقال عايز الناس تفتح دمغها زى الاستاذ ده كدة ( الاستاذ دة ادالو 20 جنيه ) قولت لصحبى انا هروح اقول للمدير انه بيرتشى قالى تلاقى المدير هو كمان بيرتشى متعملش فيها مصلح اجتماعى واتنيل على عينك هيحرجك تانى
وسلملى على الشهر العقارى وفشلت المحاوله الثانيه
المحاوله الثالثه
روحت اعمل فيش فى قسم بورفؤاد الى انا تابع ليه وكل اصحابى قبل ما اروح قالولى الراجل ده بيرتشى بياخد 3 جنيه من كل واحد المهم روحت وانا حالف بى ابو امى انى ما هدفع رشوة ودخلت وخلصت المهم فى مصاريف فيش 3 جنيه قالى دى فلوس الحكومه فين فلوسى انا
بينى وبنكم انا خايف ودة قسم مش لعبه وفى مخبرين وامناء شرطه وقفين معاه والدنيه شيطه قولت يا واد يا ضد الظلم اوعى تخاف جمد قلبك قولتلو وبسوط مخنوق وبحاول اتكلم فى حزم قاطع اتقى الله اصتبح ع الصبح احنا فى رمضان والواحد صايم وسبتو ورحت خالع
اصحابى قالولى يا حبيب ماما هيعطلك الفيش وهيدوخك قولت يا ريتنى ما عملت راجل ورحت فى معادى على القسم وانا حاطط فى دماغى ان لو ملقيتش الفيش بتاعى جاهز هطلع للمأمور واعمل فيها واد فدائى المهم روحت وقولت بصوت مبحوح فين الفيش بتاعى قلى عندك هنا دور عليه لقيته وفرحت قوى وكنت هضحك على منظر الراجل وهو مركب لى الوش الخشب
وسلملى على القسم ونجحت المحاوله الثالثه
الحمد لله الف مبروك يا ام فروق
الله يبارك فيكى يام كوثر
لولولولىىىىىىىى